Fazal-Ur-Rehman 37

فضل الرحمان کا اکتوبر میں اسلام آباد لاک ڈاؤن کرنے کا اعلان

اسلام آباد میں پریس کانفرنس کرتے ہوئے مولانا فضل الرحمان کا کہنا تھا کہ جمعیت علماء اسلام (ف) نے اکتوبر میں اسلام آباد لاک ڈاؤن کا فیصلہ کیا ہے، پورا ملک اس حکومت کے خاتمے کے لیے اسلام آباد کی طرف مارچ کرے گا جب کہ اپوزیشن جماعتوں کے اشتراک عمل کے لیے رابطوں میں ہیں اور بھرپور اشتراک عمل کے ساتھ اسلام آباد میں یکجا ہونے کے لیے کوششیں جاری ہیں۔

مولانا فضل الرحمان نے کہا کہ انڈیا کی طرف سے کشمیر کی خصوصی حیثیت کے خاتمے کے اقدامات نے ماحول کو خراب کیا اس صورتحال میں ہماری جماعت اور پوری قوم کشمیریوں کے ساتھ ہے، ہم سمجھتے ہیں کہ حکومت کو بھارتی اقدام کا پیشگی علم تھا کیونکہ بی جے پی کے منشور میں کشمیر کی خصوصی حیثیت ختم کرنے کا ذکر تھا مگر ہماری حکومت نے مجرمانہ غفلت سے کام لیا، حکومت کی مجرامانہ پالیسی کو بھی احتجاجی تحریک کا حصہ بنائیں گے۔
جے یو آئی (ف) کے سربراہ کا کہنا تھا کہ خدشہ ہے اکتوبر میں عمران خان کہیں نیویارک نہ بھاگ جائے کیونکہ جب تک یہ حکومت ہے، بچا ہوا کشمیر بھی ہم سے چلا جائے گا، انہوں نے کہا کہ ہزاروں مسلمانوں کے قاتل کوایوارڈ دینے سے مسلمانوں کی دل آزاری ہوئی، ہم امارات کی حکومت سے مطالبہ کرتے ہیں کہ مودی سے ایوارڈ واپس لے۔

اس خبر پر اپنی رائے کا اظہار کریں